Þessi kennsluhugmyndavefur inniheldur kennsluhugmyndir með viðfangsefnin orka, orkuöflun og orkunýtingu að leiðarljósi.

Í kennsluhugmyndunum má finna fjölbreytt verkefni eins og hugtakakort, krossorðaglímur, veggspjöld, glærukynningar, læsisverkefni, umræður og ritanir og eru verkefnin eru bæði einstaklings- og hópaverkefni.

​

Yfirverkefni

Til þess að halda utan um hugtakavinnuna er best að byrja á því að láta nemendur búa til vinnubók þar sem öllum verkefnunum er safnað saman. Þetta er bæði hægt að vinna í stílabók, láta nemendur hanna vinnubók, rafræna eða á pappír eða safna saman verkefnum í möppu. 

Ég mæli með því að í upphafi hvers verkefnis fari fram umræða og hugtakavinna sem nemendur setja í möppuna.

 

Markmið verkefnanna er að efla nemendur í læsi og hugtakaskilningi jafnframt því að gera þá meðvitaða um misjöfn orkuform, hvaðan við fáum orku á Íslandi, hvernig hún er nýtt og hverjir helstu orkugjafarnir eru. Hugmyndin er að nemendur átti sig á umhverfisáhrifum orkuöflunar og nýtingar og geri sér grein fyrir framtíðarlausnum í orkumálum þar sem sjálfbærni er höfð að leiðarljósi með bættri orkunýtni og orkuframleiðslu.

Áherslan er því á hugtakaskilning og lestur á fræðitexta úr námsbókum og af upplýsingasíðum á netinu. 

​

Forhugmyndir og forþekking barna skipta miklu máli í náttúrufræðikennslu og er það hlutverk kennarans að átta sig á forþekkingu nemenda á viðfangsefninu. Það er hægt að gera í upphafi verkefnisins með umræðum um viðfangsefnið og velta upp spurningunum:

• Hvað vita nemendur nú þegar um orku og orkunotkun á Íslandi?

• Hvað langar þá að vita meira um orku og orkunotkun á Íslandi?

Með þessum hætt er námstækniaðferðin KVL (Kann - vil vita - hef lært) nýtt. Hafa skal í huga að hugsanlega þarf kennarinn að leiða nemendur áfram með vísbendingum til þess að ná fram því sem þeir kunna.

​

Heildstætt þemaverkefni og stök verkefni

Undirsíðurnar undir tenglinum verkefnin innihalda verkefnin. Þetta eru sömu verkefnin en þeim er raðað upp á tvennan hátt, annars vegar sem heildstæðu þemaverkefni en hins vegar sem kennslufræðilegri nálgun eða vinnuaðferðum nemenda. 

Uppbyggingin á verkefnunum í heildstæðu þemaverkefni er hugsuð þannig að hægt er að vinna þau markvisst frá byrjun til enda þar sem þau byrja á hugtakavinnu um orku, orkuform og orkuumbreytingu en þróast svo yfir í verkefni tengd orkuöflun, orkunýtingu og umverfinu.

Fyrstu verkefnin eru einstaklingsverkefni og byggja mest á hugtakaskilningi en hópaverkefnin eru búin til með grunnþáttinn sjálfbærni í huga og snúa að álita- og ágreiningsmálum sem snerta orku og umhverfi. 

Í stöku verkefnunum geta kennara gripið eitt og eitt verkefni og unnið í tengslum við umræður eða lestur um viðfangsefnið orku, orkunöflun og orkunýtingu. 

​

​Námsmatið byggir á leiðsagnarnámi og eru matslistar sem hægt er að prenta út á pdf formi. Námsmatið byggir á jafningjamati og sjálfsmati ásamt mati kennara sem fylgist með vinnu nemenda og er til ráðgjafar og aðstoðar.